Taliyihii Ciidanka Asluubta Ee Laascaanood Oo Xalay Fiidkii Koox Dabley Ahi Toogasho Ku Dishay

Shalay makhribkii ayaa dil toogasho ah lagu khaarajiyay taliyihii Jeelka magaalada Laascaanood ee xarunta gobolka Sool Marxuum Cabdi Ciise Nuur, isaga oo xilligaasi ka soo baxay gurigiisa oo ku yaala xaafada la yidhaahdo Geeda-qarsi ee magaalda Laascaanood.

Sida ay sheegayaan wararka ka imanaya Laascaanood, taliyahiii ciidanka asluubta ee gobolka Sool oo xilligaas gurigiisa ka soo baxay wakhtigii afurkii, islamarkaana saaran gaadhigiisa oo darawalkiisu waday ayaa koox dabley ahi tacshiirad rasaas ah huwiyeen, halkaas oo taliyihii ku geeriyooday halka uu dhaawac ka soo gaadhay darawalkii gaadhiga u waday iyo askari ilaaladiisa ahaa.

Dilkan, ayaan wali la aqoonsan cida geysatay iyo cida ka dambaysay toona, balse sida ay sheegeen masuuliyiinta xukuumada ee gobolka Sool ayaa ku waramay, inaan hada cid loo hayn arrinkaa dilka laakiin dad loo qabqabtay arrinkaas taliyaha Asluubta ee Sool, balse baadhitaan dhacdadaasi ku saabsan ay ciidamada amaanku ku guda jiraan

Gudoomiyaha gobolka Sool C/llaahi Jaamac Diiriye oo xalay dilka taliyaha jeelka ee Laascaanood loogu geystay, ka dib Haatuf uga waramay khadka Tilifoonka waxna kaga weydiinay dilkaas, isaga oo ka hadlaya waxa u yidhi“ Waxa weeye Taliyaha markii uu soo afuray ee uu gurigiisa ka soo baxay ayaa taliyaha tacshiirad rasaas ah lala beegsaday, isaga oo ay la socdaan darwalkiisa oo gadhiga waday iyo askari Ilaaladiisa ahaa, arinkaana dad loo qabqabatay baa jira laakiin baadhitaan baa socda, waana la baadhayaa warka xaqiiqda ahna waxaad la helayaa aroorta (maanta)”

Gudoomiyaha mar aanu weydiinay waxa uga qorshaysan dilalka soo noqnoqonaya ee lagu bartilmaameedsanayo saraakiisha ciidamada iyo masuuliyiinta, waxa uu yidhi “ waxanu hada qorshaheeda wadnay sidii aanu u xoojin lahayn nabadgalyada gobolka, islamarkaana aad u adkayn lahayn amaanka”

Mar uu ka hadlayay badhasaabka Sool dableyda dilka toogashada ah ku khaarajiyey taliyaha Jeelka Marxuum Cabdi Ciise Nuur tiradooda waxa uu sheegay inay ahaayeen lix nin meel u dhaw halka ay taliyaha ku dileen uu gaadhi u taagnaa, meesha lagu dilay dilay taliyahana waxa la yidhaahdaa Geeda-qarsi.

Haatuf

Filed Under: News